Tag: காரைச் செய்திகள்

புலவரின் கவித்துவத்தையும் காரை மண்ணின் மகத்துவத்தையும் வெளிப்படுத்திய காரைநகர் நாகமுத்துப் புலவர் கவிதைகள் நூல் அறிமுக விழா

காரைநகர் நாகமுத்துப்  புலவர் கவிதைகள் நூல் அறிமுக விழா 
கடந்த 12ம் திகதி வியாழக்கிழமை பிற்பகல் காரைநகர் இந்துக் கல்லூரி நடராசா ஞாபகார்த்த மண்டபத்தில் கல்லூரியின் முன்னாள் அதிபர் கலாபூஷணம் பண்டிதர் மு.சு.வேலாயுதபிள்ளை அவர்கள் தலைமையில் மிகச் சிறப்பாக இடம்பெற்றது.

இவ் விழாவில் ஆசியுரையினை யாழ் பல்கலைக்கழக வாழ்நாள் பேராசிரியர் வே.தர்மரட்ணம் அவர்களும் வாழ்த்துரைகளை வடமாகாணக் கல்வி அமைச்சின் ஓய்வு நிலை பிரதிச் செயலரும் காரைநகர் அபிவிருத்திச் சபைத் தலைவருமான ப.விக்னேஸ்வரன், காரைநகர் இந்துக்கல்லூரி முன்னாள் அதிபர் திருமதி வாசுகி தவபாலன், காரை இந்துவின் முன்னாள் ஆசிரியை கலாபூசணம், பண்டிதை செல்வி யோகலட்சுமி சோமசுந்தரம், காரைநகர் மணிவாசகர் சபையின் முன்னாள் செயலர் கவிஞர் வே.குமாரசுவாமி ஆகியோரும் நூலின் அறிமுகவுரையினை சிவத்தமிழ் காவலர் ஆ.செந்தில்நாதனும் வெளியீட்டுரையினை யாழ் பல்கலைக்கழக முன்னாள் தழிழ்த் துறைத் தலைவர் பேராசிரியர் எஸ்.சிவலிங்கராசாவும் நிகழ்த்தினார்கள். 

பேராசிரியர் எஸ்.சிவலிங்கராசா தமது வெளியீட்டுரையில், காரைநகரை ஒரு புண்ணியபூமியாகத் தாம் பார்ப்பதாகவும், கலைமகளும் திருமகளும் ஒன்றாக வீற்றிருக்கும் செழிப்பும் சிறப்பும் மிக்க இடங்களில் ஒன்றாக காரைநகர் இருப்பதாகவும் குறிப்பிட்டார். உள்ளத்தைத் தொடாத இலக்கியமோ கவிதையோ நீடித்து நிலைக்கமாட்டாது. நாகமுத்து புலவருடைய கவிதைகளின் இத்தொகுப்பானது உள்ளத்தைத் தொடுவதாக அமைந்துள்ளதென அவர் மேலும் தமது உரையில் கூறினார். 

யாழ் பல்கலைக்கழக ஆங்கிலத்துறை முதுநிலை விரிவுரையாளர் கலாநிதி திருமதி வீரமங்கை ஸ்டாலினா யோகரத்தினம் நூலினை வெளியிட்டு வைக்க கௌரவப் பிரதியை செல்வி இராணி வைத்தீசுவரக்குருக்கள் பெற்றுக்கொண்டார். 

சிறப்புப் பிரதிகளை கல்விக்காருண்யன் E.S.P நாகரத்தினம், கலைமாடக்கோன் ச.சிவஞானம், காரை இந்து பழைய மாணவர் சங்க கொழும்புக் கிளையின் உப-தலைவர் திரு.சி.நேசேந்திரம், யோகா ரான்ஸ்போட் உரிமையாளர் திரு.ந.யோகநாதன், சிவம் மோட்டர்ஸ் உரிமையாளர் திரு.ச.சிவகுமார் ஆகியோர் பெற்றுக்கொண்டனர்.  

நூல் ஆய்வுரையினை கோப்பாய் ஆசிரியர் கலாசாலை பிரதி முதல்வர் செந்தமிழ்ச் சொல்லருவி ச.லலீசன் ஆற்றினார். அவர் தமது ஆய்வுரையில் நாகமுத்து புலவர் சமயம், சமூகம் சார்ந்து தமது கவிதைகளைத் தந்துள்ளார் என்றும் புலவருடைய பாட்டுத்திறத்தை சமூகம் சார்ந்து தந்துள்ள 53 கும்மிப் பாடல்களும் பறை சாற்றுவதாக அமைந்துள்ளது என்றும் கூறினார்.  இக்கும்மிப் பாடல்களில் திருக்குறளைப் புலவர் பொதித்து வைத்துள்ளமை புலவருக்கு திருக்குறளில் ஆழ்ந்த அறிவு இருந்துள்ளமையை வெளிப்படுத்துவதாக அமைந்துள்ளது எனவும் இத்தொகுப்பின் வெளியீடானது சிறந்த வரலாற்றுப் பதிவு என்பதுடன் புலவருடைய நாமம் வையம் உள்ளவரை வாழும் எனவும் குறிப்பிட்டார். மேலும் எந்தத்துறை சார்ந்தாலும் அத்துறை சார்ந்து முதன்மையானவர்களைக் காரைநர் மண் தந்துள்ளது எனவும் திரு.லலீசன் குறிப்பிட்டார். 

கனடா சைவ சித்தாந்த மன்றத் தலைவர் சிவநெறிச்செல்வர் திரு.தி.விசுவலிங்கம், பண்டிதர் ச.வே.பஞ்சாட்சரம் ஆகியோர் அனுப்பி வைத்த வாழ்த்துரைகளை காரை இந்து மாணவன் செல்வன் கனகலிங்கம் விநோதன் வாசித்தார்.  

முதன்மை விருந்தினராக சிறுவர் விவகாரங்களுக்கான இராஜாங்க அமைச்சர் திருமதி விஜயகலா மகேஸ்வரன் கலந்துகொள்ள இருந்த போதிலும் வேலைப்பழு காரணமாகக் கலந்துகொள்ளாதுவிடினும் தனது வாழ்த்துச் செய்தியினை அனுப்பிவைத்திருந்தார். இவ்வாழ்த்துச் செய்தியை தலைவர் பண்டிதர் மு.சு.வேலாயுதபிள்ளை அவர்கள் வாசித்தார். 

நன்றியுரையினை நூலின் தொகுப்பாளரும் வெளியீட்டாளருமான கனக சிவகுமாரனும் வழங்கினர். மண்டபம் நிறைந்த பார்வையாளர்கள் கலந்துகொள்ள அறிமுக விழா சிறப்பாக இடம்பெற்றது

விழாவில் எடுக்கப்பட்ட படங்களைக் கீழே காணலாம். 

காரைநகர் கலாநிதி விளையாட்டுக் கழகத்தினால் தைப்பொங்கல் பண்டிகையை முன்னிட்டு நடாத்தப்பட்ட பெரு விளையாட்டுக்களுக்கான பரிசளிப்பு விழாவும் உதைபந்தாட்ட இறுதிப் போட்டியும் தைப்பொங்கல் தினமான 14.01.2017 சனிக்கிழமை பிற்பகல் 2.30 மணிக்கு காரைநகர் இந்துக் கல்லூரி விளையாட்டு மைதானத்தில் கழகத் தலைவர் வி.சங்கர் தலைமையில் நடைபெற்றது.

இப் போட்டிக்குப் பிரதம விருந்தினராக கலைமாடக்கோன் சண்முகம் சிவஞானமும் சிறப்பு விருந்தினராக பிரித்தானிய காரைநலன்புரிச் சங்க போஷகர் ப.தவராசா,காரைநகர் பிரித்தானிய காரைநலன்புரிச் சங்கத் தலைவர் க.சோமசேகரம்,தொழிலதிபர் ந.யோகநாதன் ஆகியோரும் கௌரவ விருந்தினராக வைத்தியக் கலாநிதி சு.நடராசாவும் கலந்துகொண்டதுடன் புலம் பெயர் தேசங்களில் இருந்து வருகைதந்த பலரும் கலந்துகொண்டு போட்டிகளில் பங்குபற்றி தங்கள் பசுமையான பழைய நினைவுகள மீட்டிப்பார்த்தமை சிறப்பு நிகழ்வாக அமைந்தது.

காரைநகர் ஈழத்துச் சிதம்பரத்தில் மார்கழித் திருவாதிரை உற்சவப்பெருவிழாவின் பஞ்சரத பவனி 10.01.2017 செவ்வாய்க்கிழமை ஆயிரக்கணக்கான பத்தர்களின் அரோகராக் கோசமும் பெருந்திரளான தவில் நாதஸ்வரக் கலைஞர்களின் நாதகான மழையும் முளங்க பத்திபூர்வமாக இடம்பெற்றது.

காலை 6.30 மணிக்கு வசந்த மண்டபப் பூசையும் தொடர்ந்து திருவெம்பாவை ஓதலும் இடம்பெற்று காலை 9.00 மணிக்கு நடேசப் பெருமான் தனது பரிவாரமூர்திகளுடன் பஞ்சரதங்களில் எழுந்தருளி பத்தர்களுக்குக் காட்சி கொடுத்தார்.

காட்சிகளை  பார்வையிட தயவுசெய்து கீழேயுள்ள இணைப்பினை அழுத்தவும்.

http://www.karainagar.com/pages/part-1

காரைநகர் மணிவாசகர் சபையினரின் திருவாதவூரடிகள் புராண படனம்

ஈழத்துச் சிதம்பர வளாகத்தில் அமைந்துள்ள காரைநகர் மணிவாசக சபை மணிமண்டபம் புதுப்பொலிவு பெற்று இருப்பதுடன் மேலும்  இம் முறை அம் மணிமண்டபத்தில் திருவெம்பாவை உற்சவ காலங்களில் திருவாதவூரடிகள் புராண படனம் நிகழ்வு நடைபெற ஆரம்பமாகியுள்ளது. 02-01-2017 பி.ப 2.00 மணிக்கு  மிகவும் பக்தி பூர்வமாக சபைத்தலைவர் திரு.வே.முருகமூர்த்தி மற்றும் "அடியார்க்கு அமுதூட்டும் அண்ணல்",  திரு.க.கு.சிவபாலன் ஆகியோராலும் ஆரம்பித்து வைக்கப்பட்டது. 

                                                       புராண படனச் சிறப்பு

புராணபடனம் யாழ்ப்பாணத்தில் நல்லை நகர் ஆறுமுகநாவலரால் 19ஆம் நூற்றாண்டின் நடுப்பகுதியில் ஆரம்பிக்கப்பட்டது. சைவசமய மரபிலேயே புராணபடனத்தினை ஆரம்பித்தவர் நாவலர் பெருமானே ஆவார். யாழ்ப்பாணத்து ஆலயங்களில் கந்தபுராணத்தினைப் படிக்கச் செய்து யாழ்ப்பாணத்தை கந்தபுராண கலாசாரமாக்கியவர் நாவலர் பெருமானே ஆவார். இப் புராணபடன மூலம் சைவசமயக் கருத்துக்கள், சிறந்த தமிழ் இலக்கண அறிவு பாடல்களுக்கான தெளிவு தருவிளக்கங்கள் யாவற்றையும் கேட்கலாம்.

நாவலர் காலத்தில் அவரது மருமகன் வித்துவசிரோன்மணி பொன்னம்பலபிள்ளை அவர்கள் புராணங்களுக்கு கருத்துக் கூறும் போது எள்ளுப் போட்டால் இடமில்லாத அளவுக்கு அடியார் கூட்டம் இருப்பார்கள். அது மட்டுமன்றி எத்தனையோ பண்டிதர்கள், வித்துவான்களும் பொன்னம்பலபிள்ளை அவர்களின் பயன் சொல்வதை கேட்டு குறிப்புக்கள் எடுப்பார்கள் இவற்றில் இருந்து புராண படன சிறப்பு எவ்வளவு முக்கியத்துவம் வாய்ந்தது என்பது அறியக் கூடியதாகவுள்ளது.     

காரைநகர் ஈழத்துச் சிதம்பரத்தில் மார்கழித் திருவாதிரை உற்சவப்பெருவிழா இன்று திங்கட்கிழமை பல நூற்றுக்கணக்கான பத்தர்களின் அரோகராக் கோசத்துடன் பத்திபூர்வமாக ஆரம்பமானது.

இந்த உற்சவம் தொடர்ந்து பத்துத் தினங்கள் சிறப்பாக இடம்பெற உள்ளது.இந்த உற்சவத்தில் எதிர்வரும் 10ம் திகதி செவ்வாய்க்கிழமை பஞ்சரத பவனியும் மறுநாள் புதன் கிழமை அதிகாலை 2.00 மணி முதல் நடேசப் பெருமானுக்கு ஆருத்திரா அபிஷேகமும் அதிகாலை 5.30 மணிக்கு ஆருத்திரா தரிசனமும் இடம்பெற்று மாலை 3.30 மணிக்கு திருவூடல் உற்சவமும் தொடர்ந்து தீர்த்த உற்சவமும் இடம்பெற உள்ளது.