Category: SKDB செய்திகள்

நான் கண்ட அதிபர் கலாநிதி ஆ.தியாகராசா

அமரர் கலாநிதி. ஆறுமுகம் தியாகராசா அவர்களின் 17.07.2016இல் வெளியிட்ட  நூற்றாண்டையொட்டிய “தியாகச் சுடர்” நினைவுத் தொகுப்புக் கட்டுரை

திருமதி. உஷா செல்வரத்தினம்

ஓய்வுபெற்ற ஆசிரியர், காரைநகர்.

காரைநகர் இந்துக்கல்லூரி என்று நினைக்கும்போது, எம்மனக்கண்முன் முதற்கண் நிழலாடுபவர் அதிபர் தியாகராசாவே! இந்த உண்மையினை யாரும் மறுப்பதற்கில்லை. வெள்ளை வேட்டியும் நஷனலும் அணிந்து கம்பரமான தோற்றத்துடன் பாடசாலையின் இரு பக்க வளாகத்தினுள் நடமாடித் திரியும் அந்தக் கல்விமானின் தோற்றப் பொலிவு என்றும் எம் மனத்திரையில் விரிந்து செல்லும். காலைப் பிரார்த்தனை மணியொலி, நடராசா மண்டபத்தில் வெள்ளிக்கிழமை ஆராதனை வகுப்பு ஆரம்பம், இந்நிலைமைகளில் அதிபரின் காற்செருப்பொலியினைத் தொடர்நது எங்கும் ஒரே நிசப்தம் சிவபுராணம் ஓர் அட்சரம் கூடப் பிசகு இல்லாமல் கல்விச் செயற்பாடுகளின் மேற் பார்வை ஒழுங்குகளை மேற் கொள்ள முன்னேற்றப்படுத்தும் திட்டம்; பாடசாலை விதிமுறைகள், சட்ட  திட்டங்களை அனுசரிக்கும் மாணவர் குழாம். இதுதான் எமது அதிபர் முகாமைத்துவத்தின் கீழ் காரை இந்துக் கல்லூரியின் கல்விச் சூழல் இத்தகைய கவின் சூழலை ஏற்படுத்தி மாணவ சமுதாயத்தை அறிவு ஆற்றல், திறன் மிக்க நன்னடத்தை கொண்ட உன்னத பாதைக்கு வழிகாட்டி, நெறிப்படுத்திக் கூடவே வெற்றியும் கண்ட சாதனையாளர். எமது அதிபரை எண்ணும் தோறும் எமது உள்ளம் உவகையில் பூரித்து நிற்கின்றது. பெருமிதம் அடைகின்றது. இத்தகையாளரை காலத்தால் அழியாத உன்னத புருஷராக கருதுவதில் என்ன தவறு.

காட்சிக்கு எளியவனாய், எளிமையான தோற்றத்தைக் கொண்ட எமது அதிபர் காந்தீயத்தில் பெரிதும் நம்பிக்கை கொண்டவர். மகாத்மாவின் கருத்துக்களைப் பேசும் போதும், கற்பிக்கும் போதும் அடிக்கடி கூறுவார். ஆன்மீகத்தில் நாட்டம் கொண்ட இவர் சமய விழாக்கள் வைபவங்களை பெரியார் சொற்பொழிவுகளை நடத்தி, மாணவர்கள் செல் நெறியினை செம்மைப்படுத்திய உத்தமர். “தொட்டனைத்தூறும் மணற்கேணிமாந்தர்  தம்கற்னைத் தூறும் அறிவு” என்ற வள்ளுவர் வாய்மொழிக்கிணங்க மாணவர்கள் பல்துறை சார்ந்த நூல்களை கற்க நூலக வசதி வளங்களை விஸ்தரித்து, அதற்கென தனியானதோர் நூலகப் பொறுப்பாளரை நியமித்து, மாணவர்கள் ஓய்வு நேரங்களை நூலகத்தில் கழிக்க வாய்ப்பளித்தார். வாசிப்புத்திறனின் விருத்திக்கு வழிவகுக்கின்றார்.

மனிதனாகப் பிறந்த ஒவ்வொருவரதும் கடமையும் தான் வாழும் சமுதாயத்தின் தேவைகளை உணர்ந்து, அவற்றைப் பூர்த்தி செய்வதே என்ற கல்வியியலாளரின் சிந்தனைக்கு செயல்வடிவம் கொடுத்தவர்கள் வரிசையில் எமது அதிபரும் இடம்பிடித்துள்ளார் என்று கூறுவதில் பெருமிதம் அடைகினறேன். பதிகளுக்குள்ளே ஓர் காரைநகர், அக்காரைநகருக்கோ ஓர் இந்துக்கல்லூரி அதனை வழிப்படுத்திய, அதன் பெருமைக்கு உறுதுணையாக விளங்கிய அதிபர்கள் வரிசையில் புதியதோர் சகாப்தத்தை உருவாக்கியவர் எமது அதிபர் எனக் கூறுவது மிகை மொழியாகா.

கல்வியே சமுதாயத்தின் வளர்ச்சிக்கான ஏணிப்படி. எமது காரைநகர் மக்கள் பொருளாதாரத்தில் மட்டுமல்ல கல்வியிலும் ஏற்றம் பெற வேண்டும், காரை அன்னை ஈன்றெடுத்த புதல்விகள் உலகின் எங்கோ ஓர் மூலையில் வாழ்ந்தாலும் அவர்கள் பெருமை பேசப்பட வேண்டும் என்ற உன்னத இலக்கை இலட்சியமாகக் கொண்டு, “இந்துக் கல்லூரி” என்னும் கல்விக் கூடத்தினூடாக எதிர்கால நற்பிரஜைகளை சமுதாயத்திற்கு கையளிக்க வேண்டும் என்ற அடிப்படைக் கல்விக் குறிக்கோளை தனது மனதில் நிறுத்தி, பாடசாலைத் திட்டங்களை வகுத்து செயற்படுத்து வதில் முனைப்பாக

ஈடுபட்டவர். சாதனைகள் படைத்து மனநிறைவு அடைந்தவர். இன்று எமது கல்லூரி மாணவர்கள் மருத்துவர், பொறியியலாளர், சட்ட வல்லுநர்கள், பொருளியலாளர்கள், ஆசிரியர்கள் அதிபர்கள், கல்வியியலாளர்கள், வர்த்தகர்கள்,விவசாயிகள் என தத்தம் துறைகளில் சிறப்பாக தமக்கும் தம் குடும்பத்துக்கும், சமுதாயத்துக்கும் சேவையாற்றி வருவது கண்கூடு. நாம் எந்தச் செல்வத்தை இழந்தாலும், கல்விச் செல்வத்தை இழக்கக் கூடாது என்ற உயர்ந்த எண்ணக்கருவினை பெற்றோர் பொதுமக்கள் மத்தியில் அன்றும் இன்றும் என்றும் முனைப்புப் பெற்று நிலைபெறுவதற்கு வித்திட்டுச் சென்ற எமததிபர் கலாநிதி தியாகராசாவை மாணவ சமுதாயம் என்றும் மறக்க முடியுமா?

மேலும் பாடசாலை என்பது மாணவர்களின் மறைந்திருக்கும் ஆற்றல்களை வெளிக்கொணர்நது, வளர்ப்பதற்கான சிறந்த ஓர் களம் என்ற கருத்துக்கு செயல்வடிவம் கொடுத்தவர்களுள் எமது அதிபர் ஒருவர் எனக் கூறுவதில் என்ன தவறு? இன்று உலகளாவிய ரீதியில் பரந்து, வாழும் எமது நாட்டவர் மத்தியில் காரை இந்துக் கல்லூரி மாணவர்கள் தனக்கென தனித்துவமான சாதனைகளை பல்துறைகளிலும் ஈட்டி வருவதற்கு எமது அதிபரின் பணிக்கான பங்களிப்பு அடித்தளமாக அமைவதை நாம் யாரும் மறுக்க முடியாது.

எமது ஊர் காரைநகர், இன்று பெருமிதத்துடன் தலைநிமிர்ந்து நிறபதற்கு அடித்தளமாக அமைவது எமது பாடசாலைகளே கல்வி, ஒழுக்கம், கொண்ட பலதுறை சார்ந்த விற்பனர்கள் காரையம்பதி சமுதாயத்திறகு அன்றும் இன்றும் என்றும் கையளிககப்படுவதற்கு. இத்தகைய பெருமைக்குரியவர்கள்;; அதிபர்கள், ஆசிரியர்களே! அந்த வகையில் இன்று எமது பாடசாலைகள் மாணவ சமுதாயத்தின் கல்வி வளர்ச்சிக்கு அயராது உழைத்து வருகின்றனர் என்றால் தமது முன்னோர்கள் காட்டிய வகுத்த அரும்பணிகளே காரணம் எனக்கூறலாம். இந்த வகையில் பார்க்கும் போது தலைசிறந்த அதிபர், ஆசிரியர்களைக் கொண்ட தலைமுறையினை உருவாக்குவதில் எமது அதிபர் தியாகராசாவின் கல்விப் பணி பெருமளவில் பங்களிப்பினை செலுத்துகின்றது எனத்துணிந்து கூறலாம்.

மேலும் பாடசாலையில் மட்டுமல்ல தமது சமுதாயத்தின் தேவைகளைப் பூர்ததி செய்வதற்கு அதிபர்; சேவை மட்டும் போதியதன்று என உணர்ந்த அவர் அரசியல் களத்தில் புகுந்து வட்டுக்கோட்டைப் பாராளுமன்ற உறுப்பினராக (1970) தெரிவு செய்யப்பட்டார். தமது தொகுதி வாழ் மக்களின் தேவைகளை அவ்வப்போது, கேட்டறிந்து அவற்றை நிறைவேற்றுவதில் ஆர்வம் காட்டிய அவர், குறிப்பாக காரைநகர் மக்களுக்கென மருத்துவ வசதிகளை அங்கேயே பெற்றுக்கொள்ளக்கூடிய வகையில் வைத்தியசாலை விஸ்தரிப்பு, மத்திய தபாற்கந்தோர், குடிநீர் வசதிக்கான குழாய்நீர் விநியோகம் மின்சாரம், படித்த இளைஞர் வேலைவாய்ப்பு இன்னோரன்ன வசதிகளை பெற்றுக்கொடுத்ததோடு அமையாது, “ஈழத்துச் சிதம்பரம்” என அழைக்கப்படும் சிவன்கோயில் அமைந்த சூழல் எவ்விதத்திலும் புனிதத்துவம் கெடக்கூடாது என்பதற்காக கசூரினா கடற்கரைக்கு வருகை தரும் உல்லாசப் பயணிகளுக்கான உல்லாச விடுதி கட்டக்கூடாது என்பதற்கு ஆணிததரமாக தனது எதிர்ப்பினைத் தெரிவித்து வந்தவர்.

எனவே ஒருங்கு சேர்த்து நோக்குமிடத்து தலைசிறந்த கல்விமான்களுள் ஒருவரான எமது அதிபர் கலாநிதி ஆ.தியாகராசாவை ஈன்றெடுத்த காரையம்பதி, இன்று தலைநிமிர்ந்து, நிற்பதற்கு தனது வாழ்க்கைப் பயணத்தில் இறுதி மூச்சு வரை அரும்பாடுபட்டுழைத்த அவர்தம் பணியினை நினைவுகூரும் முகமாக வெளியிடப்படும் இம்மலர் வெளியீட்டுக் குழுவினரை உளமாரப் பாராட்டி, நிறைவு செய்கின்றேன்.

நன்றி

“ஆளுயர்வே ஊருயர்வு”

“நன்றே செய்வோம் அதை இன்றே செய்வோம்”

இங்ஙனம்

சுவிஸ் காரை அபிவிருத்திச் சபை

செயற்குழு உறுப்பினர்கள்

சுவிஸ் வாழ் காரை மக்கள்

மொழி, கல்வி, கலை மேம்பாட்டுக் குழு

17 – 04 – 2023

காரைநகர் பிரதேச வைத்தியசாலை புனரமைப்பு

சுவிஸ் காரைஅபிவிருத்திச் சபையினால்  காரைநகர்  பிரதேச   வைத்தியசாலையில் கிழக்கு பக்கமாக  60`x22` பரப்பளவு கொண்ட கட்டிடத்தொகுதி நிர்மாணிக்கப்பட்டு ஈ.சி.ஜி அறை மற்றும் வைத்திய அதிகாரி தங்கும் அறை அமரர் தில்லையம்பலவாணர்  தலைமையில்  கலாநிதி நடராசா ஜெயக்குமாரன்  அவர்களால் 26.06.2006இல் திறந்து வைக்கப்பட்டது.  இக் கட்டிடத்தொகுதியானது தற்பொழுது பிரசவ சிகிச்சை (Clinic)  நிலையமாக பாவிக்கப்பட்டு வருகின்றது.

காரைநகர் பிரதேச வைத்தியசாலை நோயாளர் நலன்புரிச் சங்கத்தினர் இக் கட்டிடத்தொகுதியின் புனரமைப்பு வேலைகள் தொடர்பாக எமது சபையினருக்கு விடுத்த கோரிக்கைக்கிணங்க அவர்களது பணிகள் தொடர எமது சபையால் ஐந்து இலட்சம் (500 000.00) ரூபாய்கள் நிதியுதவி வழங்கி வைக்கப்பட்டது.

புனரமைப்பு பணிகளின் நிழற்படத் தொகுப்பு இணைக்கப்பட்டுள்ளது.

நன்றி

“ஆளுயர்வே ஊருயர்வு”

“நன்றே செய்வோம் அதை இன்றே செய்வோம்”

இங்ஙனம்

                சுவிஸ் காரை அபிவிருத்திச் சபை

               செயற்குழு உறுப்பினர்கள்

  மொழி,கல்வி, கலை மேம்பாட்டுக்குழு

சுவிஸ் வாழ் காரை மக்கள்

18.03.2023

மிருதங்கம் ஆற்றுகை வெளிப்பாட்டுத் தேர்வு 2023

யாழ் காரைநகரைச் சேர்ந்த திரு. திருமதி கணேசபிள்ளை, தவமணி, பரஞ்சோதி, பத்மாவதி ஆகியோரின் பேரனும், கனடாவைச் சேர்ந்த மிருதங்க வித்துவான் பரஞ்சோதி ரதிரூபன் அவர்களின் மருமகனுமாய்த் திகழ்பவர் செல்வன் சந்திரலிங்கம் ஜலக்சிகன் அவர்கள் “கலாவித்தகர்” திரு ருக்‌ஷன் ஸ்ரீரங்கராஜா அவர்களிடம் முறைப்படி மிருதங்கம் பயின்று 06.01.2023 வெள்ளிக்கிழமை அன்று சூரிச் வரசித்தி மஹால் Huttenwiesenstrasse 6, 8108 Dallikon மண்டபத்தில் மாலை 16.30 மணிக்கு மிருதங்கம் ஆற்றுகை வெளிப்பாட்டுத் தேர்வு நடைபெற இருப்பதால் அனைவரையும் அன்புடன் கலந்து சிறப்பிக்கும் வண்ணம் அழைக்கின்றனர் துர்க்கா தாளலயாலயம்.

சுவிஸ் காரை அபிவிருத்திச்சபையின் அனுசரணையில் க.பொ.த சாதாரணப் பரீட்சையின் ஆங்கில பாடத்திட்டத்திற்கான பயிற்சிநெறி வகுப்புக்கள்.

உ

சிவமயம்

குஞ்சி யழகுங் கொடுத்தானை கோட்டழகும்

மஞ்சள் அழகும் அழகல்ல – நெஞ்சத்து

நல்லம்யாம் என்னும் நடுவு நிலைமையால்

கல்வி அழகே அழகு

-நாலடியார்

எமது சபை மாணாக்கரின் தொழில்சார் நிபுணத்துவம், மொழித்திறன், கலை, கல்வி, விளையாட்டுத்துறை போன்ற விடயங்களை மேம்படுத்தும் முகமாகக் கலை, கல்வி, மற்றும் மொழி மேம்பாட்டுக் குழு ஒன்றினை உருவாக்கி ஊக்கமளித்து வருகின்றது. காரைநகர் பாடசாலை அதிபர்கள், ஆசிரியர்கள், பெற்றோர்கள் நலன்விரும்பிகளது வேண்டுகோளுக்கிணங்க வருகின்ற வருடம் பங்குனிமாதம் 2023ஆம் ஆண்டு  நடைபெற இருக்கின்ற பதினொராம் ஆண்டு மாணவருக்கான க.பொ.த சாதாரணப் பரீட்சையின் ஆங்கில பாடத்திட்டத்திற்கான பயிற்சிநெறி வகுப்புக்கள் யாழ் மாவட்ட கல்விவலய ஆங்கிலப்பாடத்திற்கான பிரதிக்கல்விப் பணிப்பாளர் திரு. கோ. சுப்பிரமணியம் அவர்களால் 12.11.2022 சனிக்கிழமை  யாழ்ற்றன் கல்லூரயில் வெகு சிறப்பாக நடைபெற்றது.

காரைநகர் யாழ்ற்றன் கல்லூரி,வியாவில் சைவமகா வித்தியாலயம் ஆகிய பாடசாலை மாணவர்கள் ஆங்கில பாடத்திட்டத்திற்கான பயிற்சிநெறி வகுப்பில் கலந்து சிறப்பித்திருந்தார்கள். காரை இந்துக்கல்லூரி, சுந்தரமூர்த்தி நாயனார் வித்தியாலயம் ஆகிய பாடசாலை மாணவர்களுக்கான ஆங்கில பாடத்திட்டத்திற்கான பயிற்சிநெறி வகுப்புக்கள் பிரிதொரு திகதியில் நடைபெறும் என்பதை அறியத்தருகின்றோம்.

மாணவரின் ஆளுமை விருத்தியே காரைநகரின் வளர்ச்சியின் ஆதாரம் என்பதால் ஆங்கில மொழிப் பயிற்சி தொடர்பாக முன்முயற்சிகள் எடுக்கப்பட வேண்டும் என கலாநிதி திருமதி. வீரமங்கை ஸ்ராலினா யோகரத்தினம் சிரேஷ்ட ஆங்கில விரிவுரையாளர் மொழியியற் துறை யாழ்ப்பாணப் பல்கலைக்கழகம், மானிப்பாய் இந்து மகளிர் கல்லூரி ஆசிரியர் விஜயரத்தினம் பிரேமதாஸ் குமாரஸ்ரீ அவர்களும் கருத்துரை வழங்கியிருந்தார்கள். இறுதியாக மாணவர்களுக்கு சிற்றுண்டி வழங்கி ஆங்கில பாடத்திட்டத்திற்கான பயிற்சிநெறி இனிதே நிறைவு பெற்றது. இந் நிகழ்வுக்கு உதவிபுரிந்த நிறைந்த உள்ளங்கள் அனைவருக்கும் எமது நன்றிகளைத் தெரிவித்துக்கொள்கின்றோம்.

நிழற்படங்களை கீழே காணலாம்.

நன்றி

“ஆளுயர்வே ஊருயர்வு”

“நன்றே செய்வோம் அதை இன்றே செய்வோம்”

இங்ஙனம்

                சுவிஸ் காரை அபிவிருத்திச் சபை

               செயற்குழு உறுப்பினர்கள்

  மொழி, கல்வி, கலை மேம்பாட்டுக்குழு

சுவிஸ் வாழ் காரை மக்கள்

13.11.2022

அமரர்  ஐயாத்துரை சோமஸ்கந்தமூர்த்தி (ஐ.தி சம்பந்தன்) அவர்களின் நினைவேந்தல்.

யாழ் காரைநகர் களபூமி வளுப்போடையைப் பிறப்பிடமாகவும் பிரித்தானியா (லண்டன்) வதிப்பிடமாகவும் கொண்ட ஓய்வு பெற்ற மொழி பெயர்ப்பாளர் (இலங்கை துறைமுக அதிகாரசபை) தமிழ் தொழிற்சங்க கூட்டணியின் முன்னாள் செயலாளரும், தமிழ் ஆர்வலரும், உலக சமாதான சபையின் முன்னாள்  செயலாளருமான  அமரர்  ஐயாத்துரை  சோமஸ்கந்தமூர்த்தி (ஐ.தி சம்பந்தன்) அவர்களின் மறைவு குறித்த நினைவு அஞ்சலிக் கூட்டம் 15.05.2022 ஞாயிற்றுக்கிழமை பிற்பகல் 15.00 மணிக்கு ஸ்ரீ விஷ்ணு துர்க்கா திருமண மண்டபம்  (Edikerstrasse 24, 8635 Dürnten, Zürich) என்ற முகவரியில் அமைந்துள்ள மண்டபத்தில் நடைபெற்றது.

சுவிஸ் காரை அபிவிருத்திச் சபையின் செயற்குழு உறுப்பினர்களால் ஏற்பாடு செய்யப்பட்ட  கூட்டத்தினை சபையின்  போஷகர் தவத்திரு. ஸ்ரீலஸ்ரீ. சுவாமி த.சரஹணபவானந்தா தலைமையில் நினைவு அஞ்சலிக் கூட்டம் ஆரம்பமானது. அமரர் ஐயாத்துரை சோமஸ்கந்தமூர்த்தி (ஐ.தி சம்பந்தன்) திருவுருவப்படத்திற்கு அமரரது உறவினர்களான திரு முருகேசு சற்குணராஜா  (Zürich) அவர்கள் ஈகைச்சுடரினையும், திரு. நடராஜா சிவலோகநாதன் (Basel) அவர்கள் சந்தனமாலையை அணிவித்தும், தவத்திரு. ஸ்ரீலஸ்ரீ. சுவாமி த.சரஹணபவானந்தா ஐயா அவர்கள் தீபாஞ்சலி செலுத்தியும், அதனைத்தொடர்ந்து புலம்பெயர் நாடுகளில் உள்ள காரைநகர் அமைப்புக்களின் பங்களிப்புடன் காரைநகரில் உள்ள காரை அபிவிருத்தி சபை ஊடாக காரைநகர் மக்களின் கல்வி,குடிநீர்பிரச்சனை, வாழ்வாதாரம்  என பல்வேறு தளங்களின் ஊடாக எமது ஊரின் வளர்சிக்கு முக்கிய தொண்டாற்றி எல்லோர் மனதிலும் நீங்கா இடம்பிடித்த அமரர் திருநாவுக்கரசு சிவாமகேசன் ஆகிய இருவருக்கும்        இரு நிமிட அக வணக்கம் செலுத்தியும், நினைவு அஞ்சலிக் கூட்டத்திற்கு வருகைதந்தோர்கள்  திருவுருவப்படத்திற்கு  மலர்தூவி வணக்கம் செலுத்தியும் நிகழ்வுகள் ஆரம்பமாகின.

ஐ.தி சம்பந்தன் ஐயா அவர்கள் கால் பதித்த இடங்கள் ஏராளம், ஆரம்ப காலத்தில் தமிழரசுக்கட்சி பின் தமிழர் விடுதலைக் கூட்டணியின் ஓர் அங்கமாக செயல்பட்டு அன்றைக்கே விடுதலைக்கு குரல்கொடுத்த தன்னலமறற  தொண்டராவர். அதன் பின்னர் இலங்கை எழுதுவினைஞர் சங்கத் தலைவராகவும் மொழி பெயர்ப்பாளராகவும் செயல்பட்டு வந்ததோடு மட்டும் இல்லாமல் சுடரொளி வெளியீட்டுப்பிரிவை உருவாக்கி பல நூல்களை வரலாற்றுப்பதிவுகளாக பிரசவித்த வரலாறும் உங்களைச்சாரும். பன்முக ஆளுமையும், உயர்ந்த பல அனுபவங்களையும் ஊர்சார்ந்த சிந்தனைகளையும் தன்னகத்தே கொண்ட ஐ.தி சம்பந்தன் ஐயா அவர்களின் இரங்கல் உரையை சபையின் செயலாளர் திரு. முருகேசு பாலசுந்தரம் அவர்களும், நினைவுரைகளை சபையின்  போஷகர் தவத்திரு. ஸ்ரீலஸ்ரீ. சுவாமி த.சரஹணபவானந்தா அவர்களும், சுவிஸ் காரை அபிவிருத்திச் சபையின் முன்னைநாள் தலைவர்களான திரு. நல்லதம்பி சரவணப்பெருமாள், திரு. ஆறுமுகம் செந்தில்நாதன், மற்றும் திரு. நடராஜா சிவலோகநாதன்,                    திரு. தர்மரத்தினம் லோகேஸ்வரன் ஆகியோர்கள் உணர்வு பூர்வமாக நினைவுரைகளை ஆற்றியிருந்தார்கள்.

அமரர் ஐயாத்துரை சோமஸ்கந்தமூர்த்தி (ஐ.தி சம்பந்தன்) அவர்களின் வணக்க நிகழ்வுக்கு சமூகமளித்தோருக்கு சுவிஸ் காரை அபிவிருத்திச்சபையின் போஷகர் தவத்திரு. ஸ்ரீலஸ்ரீ. சுவாமி த.சரஹணபவானந்தா அவர்களின் நன்றியுரையுடனும்,வருகை தந்தோருக்கு சிற்றுண்டிகள் வழங்கியும் நினைவுக் கூட்டம் 17.30 மணிக்கு நிறைவுபெற்றது.

ஓம் சாந்தி!   ஓம் சாந்தி!!   ஓம் சாந்தி!!!

இங்ஙனம்

சுவிஸ் காரை அபிவிருத்திச் சபை,

செயற்குழு உறுப்பினர்கள்,

மொழி,கல்வி, கலை மேம்பாட்டுக்குழு,

சுவிஸ் வாழ் காரை மக்கள்.

18.05.2022

சுவிஸ் காரை அபிவிருத்திச் சபை மன்றத்திற்கான கீதத்தை இயற்றியவரும் “முத்தமிழின் இலக்கிய வித்தகருமான” ஜயா தமிழ்மணி அகளங்கன் தலைமையில் பல தமிழறிஞர்கள், கல்வியாளர்கள், தமிழ், சமய உணர்வாளர்கள் கலந்து சிறப்பிக்கும் மதிப்புக்குரிய ஒய்வுநிலை ஆசிரியர் கலாபூஷணம் யோகலட்சுமி சோமசுந்தரம் அவர்களின் பவளவிழாவும், அவரால் கடந்த காலங்களில் எழுதப்பட்டு வந்த சமய இலக்கிய கட்டுரைகளின் தொகுப்பின் நூல் வெளியீடும் சிறப்புற்று விளங்க சுவிஸ் காரை அபிவிருத்திச் சபை வாழ்த்துகின்றது.