Category: CKCA MEETING

கனடா-காரை கலாச்சார மன்றம் தயாகத்திலிருந்து கனடாவிற்கு விடுமுறையில் வந்திருந்த காரைநகர் தொழிலதிபரும், சமூக சேவையாளரும், முன்னாள் இந்து கலாச்சார அமைச்சர் மண்ணின் மைந்தன் தியாகராசா மகேஸ்வரனின் அன்புத் தம்பியுமான திரு.தியாகராசா பரமேஸ்வரன் அவர்களை வரவேற்று 10.08.2014 ஞாயிற்றுக்கிழமை மாலை 5 மணியளவில் கலந்துரையாடல் ஒன்றினை நிர்வாக சபை உறுப்பினர்களுடன் ஒழுங்கு செய்திருந்தது.

கனடா காரை கலாச்சார மன்றத்தின் தலைவர் திரு.தம்பிஐயா பரமானந்தராசா தலைமையில் நடைபெற்ற இந்நிகழ்வில் தலைவர் வரவேற்கவும், கனடா காரை கலாச்சார மன்றத்தின் அனுசரணையாளரும், திரு.தி.பரமேஸ்வரனின் நீண்டகால நண்பருமான திரு.பாலசுப்பிரமணியம் மகாதேவன் அவர்கள் மாலை அணிவித்து பொன்னாடை போர்த்தி கௌரவிக்கவும் நிகழ்வுகள் ஆரம்பமானது. கனடாவிற்கு வருகை தரும் காரைநகர் சேவையாளர்களை கனடா காரை கலாச்சார மன்றம் கடந்த காலங்களிலும் இப்போதும் கௌரவித்து வருவதையும் அதற்கான காரணங்களையும் மன்றத்தின் பதில் செயலாளர் காரணங்களுடன் விளக்கியதுடன், திரு.தியாகராசா பரமேஸ்வரன் முன்னாள் அமைச்சர் தியாகராசா மகேஸ்வரன் விட்டுச்சென்ற பணிகளில் ஒன்றான சிவப்பணியினை முன்னின்று செயற்படுத்தி வருவதும், காரைநகர் ஈழத்து சிதம்பரத்தில் இறுதியாக நடைபெற்ற கும்பாபிஷேக செலவுகளான 35 இலட்சத்திற்கு மேற்பட்ட நிதியினை காரைநகர் வர்த்தகர்களை ஒன்றிணைத்து அதன் மூலம் நிவர்த்தி செய்தமையினையும், அடியார் சபை, திருப்பணி சபை பிணக்குகளின் போது இலட்சக்கணக்கான நிதியினை நீதி மன்ற வழக்குகளிற்காக செலவு செய்தமையினையும் சுட்டிக்காட்டிதுடன், கடந்த காலங்களில் காரைநகர் சேவை அமைப்புக்களில் ஏற்பட்ட பிணக்குகளை சுமூகமான முறையில் தீர்த்து வைக்க எடுத்த நடவடிக்கைகளையும் சுட்டிக்காட்டியதுடன், காரைநகர் மக்களின் குடிநீர் பிரச்சனைக்கு நிரந்தர தீர்வு காண்பதற்கும், காரைநகர் அபிவிருத்தி சபை மாணவர் நூலக திட்டத்திற்கு காரைநகர் வர்;த்தகர்களின் உதவியினை பெற்று வழங்குவதற்கும் திரு.தியாகராசா பரமேஸ்வரன் முயற்சிகளை வழங்குமாறும் கேட்டுக் கொள்ளப்பட்டது.

திரு.தியாகராசா பரமேஸ்வரன் தனது உரையில் காரைநகர் மக்களின் ஒற்றுமையினை முன்னிறுத்தி உரை நிகழ்த்தியிருந்தார். வெளிநாடுகளில் ஒவ்வொரு நாடுகளிலும் காரைநகர் மண்ணின் பெயரால் ஒரே ஒரு அமைப்பு மட்டுமே இயங்க வேண்டும் என்றும், அந்த அமைப்பினை வலுப்படுத்த அனைத்து இடம் பெயர்ந்த மக்களும் முன்வந்து உழைக்க வேண்டும் எனவும் கேட்டுக் கொண்டார். அது மட்டுமல்லாது இடம் பெயர்ந்த நாடுகளில் உள்ள காரை மன்றங்கள் காரைநகரில் செயற்படுத்தும் திட்டங்களை காரைநகர் அபிவிருத்தி சபை ஊடாக மட்டுமே நிறைவேற்ற முன்வர வேண்டும் எனவும் ஆளாளுக்கு ஒவ்வொரு திட்டங்களாக செயற்படுத்த முனைந்து பல திட்டங்கள் முற்றுப்பெறாமல் இருப்பதற்கான காரணம் இதுவே என்றும் தெரிவித்தார்.

அத்துடன் காரைநகர் ஈழத்து சிதம்பரம் நித்திய பூசைகளிற்காக கனடா காரை கலாச்சார மன்றம் கனடவில் காரைநகர் மக்களை ஒன்று திரட்டி தினம் ஒரு அடியவராக 300 அடியவர்களை ஈழத்து சிதம்பர ஆதீனகர்தாக்களுடன் நேரடியாக தொடர்பு ஏற்படுத்தி கொடுக்க வேண்டும் எனவும் தனது வேண்டுகோளினை முன்வைத்திருந்தார்.

காரைநகர் மக்களின் குடிநீர் பிரச்சனைக்கு நிரந்தர தீர்வு காண வெளிநாடுகளில் உள்ள காரைநகர் மக்களினால் மட்டுமே அறிவும், திறமையும், ஊர்ப்பற்றும் நிறைந்த பொயியலாளர்களின் உதவிகளை பெற்று காரைநகர் மண்ணின் தன்மையும், நிலத்தடி நீரின் ஆழம், மற்றும் மழை வீழ்ச்சி, நீர் நிலைகளின் தன்மை என்பவற்றை ஆராய்ந்து திட்டம் தீட்டப்பட வேண்டும் எனவும் இந்த பாரிய முழுமையான திட்டத்தை வெளிநாடுகளில் இயங்கும் காரை அமைப்புக்கள் ஒன்றிணைந்து பொறியியலாளரை வரவழைத்து முழுமையான திட்டத்தை தயாரித்து வழங்கினால் அதனை தற்போது வடமாகாண சபையில் தமிழ் மக்களின் வோட்டுக்களைப் பெற்று பதவியில் அமர்ந்திருக்கும் தமிழ் தேசிய கூட்டமைப்பின் ஊடாக நிறைவேற்ற காரைநகர் வர்த்தகர்களுடன் இணைந்து முழுமையான முயற்சியில் ஈடுபடுவேன் எனவும் உறுதியளித்தார்.

அதுபோன்று காரைநகர் அபிவிருத்தி சபை மாணவர் நூலக திட்டத்திற்கு காரைநகர் வர்த்தகர்கள் நிச்சயமாக உதவ முன்வருவார்கள் எனவும் காரைநகர் மாணவர் நூலக திட்டத்தின் முழுமையான திட்டத்தினை வழங்குமாறும், காரைநகர் அபிவிருத்தி சபை காரைநகர் வர்த்தகர்களை நம்பி முழுமையாக அப்பணியினை வழங்கினால் காரைநகர் வர்த்தகர்களினால் தலா ஒருவர்க்கு 10 இலட்சம் வழங்கி ஆறுமாத காலத்தினுள் முழுமை பெற்ற மாணவர் நூலகமாக அமைத்துக் கொடுக்கலாம் எனவும், காரைநகர் கோயில்களிற்கு காரைநகர் வர்த்தகர்கள் பலர் 10 இலட்சத்திற்கும் அதிகமான தொகையினை வழங்கி வந்துள்ளார்கள் என்றும் நிச்சயமாக காரைநகர் பாடசாலை பிள்ளைகளின் கல்வி வளர்ச்சிக்கும் அமோக ஆதரவு வழங்குவார்கள் என்றும் ஆனாலும் காரைநகர் அபிவிருத்தி சபை இதுவரை முழுமையான திட்டங்களுடன் காரைநகர் வர்த்தகர்களை அனுகவில்லையெனவும் தெரிவித்தார்.

திரு.தியாகராசா பரமேஸ்வரன் அவர்கள் பிரான்ஸ், லண்டன், அமெரிக்கா, ஜேர்மனி போன்ற நாடுகளிற்கு நேரடியாக சென்று காரைநகர் மக்களின் வாழ்க்கை நிலமையினை நன்கு அறிந்து கொண்டவர். அந்த வகையில் வெளிநாடுகளில் வாழும் காரைநகர் மக்கள் தமது சொந்த வாழ்க்கைத் தரத்தினை சுமூகமாக கொண்டு செல்வதற்கே உழைத்து வரும் வேளையில் வேலைப்பழுவிற்கு மத்தியிலும் ஊர் நினைவுடன் தம்மால் சிறியளவு தொகையினையே வழங்க முடியும் என்பதனையும்  தான் அறிந்து கொண்டுள்ளதாகவும், ஆனாலும் காரைநகரின் அபிவிருத்தியும் புனரமைப்பும் வெளிநாடுகளில் வதியும் காநைரகர் மக்களின் ஒற்றுமையிலே தங்கியுள்ளதாகவும், வெளிநாடுகளில் வதியும் ஒவ்வொரு காரைநகர் மக்களும் சிறு தொகையாகினும் தம்மால் முடிந்த ஒரு டொலராகினும் பொது அமைப்புக்களுக்கு வழங்கினால் அவர்களது பங்களிப்பின் மூலம் ஒற்றுமையினை புலப்படுத்த முடியும் எனவும், உதாரணமாக கனடா காரை கலாச்சார மன்றத்தின் வரவு செலவு அறிக்கையில் கனடாவில் வதியும் அனைத்து காரைநகர் மக்களின் பெயர்களும் ஒரு டொலர் வழங்கினாலும் வரவேண்டும் எனவும் அதன் மூலமே கனடாவில் காரைநகர் மக்கள் ஒற்றுமையுடன் செயலாற்றுகின்றார்கள் என்ற கனடா வாழ் காரைநகர் மக்களின் ஒற்றுமை காரைநகர் மக்களிற்கும் காரைநகர் வர்த்தகர்களிற்கும் பலமாக இருக்கும் எனவும் தெரிவித்தார்.

கனடா காரை கலாச்சார மன்றத்தின் நிர்வாக சபை உறுப்பினர்களுடன் இரண்டு மணி நேரத்திற்கும் மேலாக நடைபெற்ற பயனுள்ள இக்கலந்துரையாடல் கனடா காரை கலாச்சார மன்றம் அடுத்து எடுக்கவுள்ள முயற்சிகளிலும், வெளிநாடுகளில் உள்ள காரை அமைப்புக்கள்  இக்கலந்துரையாடலின் மூலம் உள்வாங்கிக் கொள்ளும் செய்திகள் மூலமாகவும் பயனுள்ளதாக அமைத்துக் கொள்ள முடியும்.
கலந்துரையாடலின் முடிவில் கனடா காரை கலாச்சார மன்றத்தின் நிர்வாக சபையினரால் இராப்போசன விருந்தும் வழங்கப்பட்டது.

மேற்படி நிகழ்வு 27.07.2014 அன்று கனடா ஸ்காபுரோவில் அமைந்துள்ள ஸ்காபுரோ சிவிக் சென்டர் மண்டபத்தில் கனடா காரை கலாச்சா மன்றத்தின் முன்னாள் தலைவர் திரு.சண்முகம் கந்தசாமி(ஓய்வு பெற்ற M.L.T) தலைமையில் நடைபெற்றது.

காலை 10.30 மணியளவில் விழா திருமதி.நாகேஸ்வரி சிறிவர்ணசூர்யா அவர்களின் மங்கள விளக்கேற்றலை தொடர்ந்து திரு. தம்பையா அம்பிகைபாகன் அவர்களின் இறைவணக்கத்துடன் ஆரம்பமானது. திருமதி ஞானாம்பிகை குணரத்தினம் அவர்கள் மலர் செண்டு கொடுக்கவும், திரு.கனக சிவகுமரன் அவர்கள் மாலை அணிவித்து விழா நாயகன் திரு.பேரம்பலம் நாகரத்தினம் அவர்களை வரவேற்றனர். அதனைத் தொடர்ந்து விழா தலைவர் திரு.சண்முகம் கந்தசாமி அவர்களின் வரவேற்புரையினை தொடர்ந்து கனடா காரை கலாச்சார மன்றத்தின் தலைவர் திரு.தம்பையா பரமானந்தராசா, போஷகர் சபை உறுப்பினர் திரு.ரவி ரவீந்திரன் ஆகியோரது கொளரவ உரைகளை தொடர்ந்து கனடிய தமிழ் ஒலிபரப்பு கூட்டுத்தாபன அதிபர் திரு.கந்தையா சிவசோதி(இளையபாரதி) அவர்களின் உரையும் இடம்பெற்றது.

அதனைத் தொடர்ந்து திரு.வேலாயுதம்பிள்ளை முருகேசம்பிள்ளை, திரு.சிவா கந்தையா, ஆகியோரது உரைகளை தொடர்ந்து பிரபல் பல் வைத்தியர் ஆதிகணபதி சோமசுந்தரம் அவர்கள் மலர் மாலை அணிவித்து கௌரவித்ததுடன் சிற்றுரையாற்றினார். தொடர்ந்து திரு.சிவகுரு கந்தையா(மதவாச்சி) அவர்கள் மாலை அணிவித்து, பொன்னாடை போர்த்தி விழா நாயகன் திரு.பேரம்பலம் நாகரத்தினம் அவர்களை கௌரவித்தார். தொடர்ந்து திரு.இளையபாரதி அவர்கள் நினைவு கேடயத்தினை வழங்கி கௌரவிக்க, மன்றத்தின் நிர்வாக சபை உறுப்பினர் திரு.குமரேசன் கனகசபை அவர்களும், போஷகர் சபை இணைப்பாளர் திரு.வேலுப்பிள்ளை இராஜேந்திரம் அவர்களும் பொன்னாடை போர்த்தி கௌரவித்தனர்.

அதனைத் தொடர்ந்து விழா நாயகன் கனடா காரை கலாச்சார மன்றம், கனடிய தமிழ் ஒலிபரப்பு கூட்டுத்தாபனம் இணைந்து வழங்கிக கௌரவத்தினை ஏற்றுக்கொண்டு உரையாற்றினார். அவர் தனது உரையிலே தனது கனடாவிற்கான வருகை சொந்த முயற்சியின் பயனாக கைகூடியது என்றும், ஆரம்ப மேற்படிப்பு கல்வி எதனையும் தான் கற்றிராத போதிலும், தனது தொழில் முயற்சியால் முன்னேறி இற்றைக்கு யாழ்நகரில் முன்னணி தொழிலதிபராக விளங்கினாலும், தன்னை காரைநகர் சமூகத்தினராலும், யாழ்ப்பாண சமூகத்தினராலும் இனம் காணப்பட்டு 'கல்விக்காருண்யன்' என்ற சிறப்பு கௌரவத்தினை கொடுத்தது கல்வி வளர்ச்சியின் முக்கியத்துவத்தினை உணர்ந்து பாடசாலைகளிற்கு தன்னால் வழங்கப்பட்ட சிறு உதவிகளே என்றும், அந்த வகையில் கனடா காரை கலாச்சார மன்றமும் தம்மால் ஆன கல்விக்கான உதவிகளை என்றென்று தொடர்ந்து வழங்கி வரவேண்டும் எனவும், காரைநகர் மக்களிற்கு முதல் தேவை அதுவே என்றும் தனது உரையில் தெரிவித்தார்.

அதனை தொடர்ந்து நன்றி உரையுடன் விழா இனிதே நடைபெற்றது. விழா முடிவில் மதியபோசனம் உணவுசாலை ஒன்றில் வழங்கப்பட்டு வழியனுப்பி வைக்கப்பட்டார் கௌரவத்தினை பெற்றுக்கொண்ட திரு.பேரம்பலம் நாகரத்தினம் அவர்கள்.

      கனடா-காரை கலாச்சார மன்றம் – கலந்துரையாடல்

காலம்: 01.06.2014 ஞாயிற்றுக்கிழமை
நேரம்: காலை 9.30
இடம்: Scarborough Civic Center  மண்டபம்
நிகழ்ச்சி நிரல்:
1. கடவுள் வணக்கம்
2. மௌன அஞ்சலி
3. தலைவர் உரை
4. போசகர் சபை இணைப்பாளர் உரை
5. அங்கத்தவர் தொடர்பான கலந்துரையாடல்

மேற்படி கலந்துரையாடலில் கனடா-காரை கலாச்சார மன்றத்தின் நிர்வாக சபை உறுப்பினர்கள், போசகர் சபை உறுப்பினர்கள் மற்றும் மன்றத்தின் அங்கத்தவர்கள் அனைவரும் பங்கு பற்றலாம்.

 கலந்துரையாடலில் பங்குபற்றும் அங்கத்தவர்கள் கனடா காரை கலாச்சார மன்றத்தின் 2014ம் ஆண்டுக்கான அங்கத்தவர் பணம் செலுத்தி அங்கத்தவராக இணைந்திருக்க வேண்டும். இதுவரை இவ்வாண்டுக்கான அங்கத்தவர் பணம் செலுத்தாதவர்கள் மண்டப வாயிலில் இவ்வருடத்திற்கான அங்கத்தவர் பணத்தினை செலுத்திய பின்னர் பங்குபற்றலாம்.

கலந்துரையாடலில் அங்கத்தவர்கள் எவரேனும் தமது கருத்துக்களை மன்றத்திடம் முன்வைக்கவோ அன்றி தமது கருத்துக்களைப் பற்றி கலந்துரையாடவோ விரும்பின் 30.05.2014 வெள்ளிக்கிழமைக்கு முன்னர் மன்றத்திற்கு எழுத்து மூலம் அறியத்தருமாறும், எழுத்து மூலம் அறியத்தரப்படும் அங்கத்தவர்களிற்கு மட்டுமே கலந்துரையாடலில் நேரம் ஒதுக்கப்படும். karainagar@gmail.com இமெயில் ஊடாகவோ, அல்லது தபால் மூலமாக ஆங்கிலம், தமிழ் இவற்றுள் எந்த மொழியிலும் மன்றத்திற்கு அறியத்தந்து உங்களிற்கான நேரத்தை ஒதுக்கிக்கொள்ளுங்கள். ஏற்கெனவே 30 அங்கத்தவர்கள் நிர்வாக சபைக்கு எழுதியனுப்பிய கருத்துக்கள் கலந்துரையாடலில் சேர்த்துக்கொள்ளப்பட்டுள்ளது.

                                                                            நன்றி!

கனடா- காரை காலச்சார மன்றம்

19.05.2014 திங்கட்கிழமை மாலை 3 மணியளவில் ஆதி சிவன் ஆலய மண்டபத்தில் மேற்படி நிர்வாக சபை கூட்டம் அவசரமாக கூட்டப்பட்டது. 13 நிர்வாக அங்கத்தவர்கள் கூட்டத்திற்கு சமூகமளித்திருந்தனர். கடந்த நிர்வாக சபை கூட்டங்களில் எடுக்கப்பட்ட தீர்மானங்கள் தொடர்பாக ஒரு சிலரால் அதிருப்தி தெரிவித்து அனுப்பப்பட்ட வேண்டுகோள் நிர்வாக சபையினரால் மூன்று மணிநேரமாக பரிசீலிக்கப்பட்டது. மன்றத்தின் நற்பெயர், நிர்வாக அங்கத்தவர்களின் ஒற்றுமை, மன்ற அங்கத்தவர்களின் நல்லெண்ணம் என்பவற்றை கருத்திற் கொண்டு நிர்வாக அங்கத்தவர்கள் ஒவ்வொருவருக்கும் தமது கருத்துக்களை தெரிவிக்க போதிய நேர அவகாசம் கொடுக்கப்பட்டது.

மன்றத்தின் யாப்பு விதிகளை பாதிக்காத வகையிலும், நிர்வாக சபையினரின் ஒருமித்த கருத்துக்களின் அடிப்படையிலும் எதிர்வரும் யூன் மாதம் 1ம் திகதி, நிர்வாக அங்கத்தவர்கள், போசகர் சபை உறுப்பினர்கள் மற்றும் நிர்வாக சபையில் நிறைவேற்றப்பட்ட தீர்மானங்கள் தொடர்பாக கருத்து தெரிவிக்க விரும்பும் மன்றத்தின் பொது அங்கத்தவர்கள் கலந்து கொள்ளும் கலந்துரையாடல் ஒன்று நடாத்துவது என தீர்மானிக்கப்பட்டது.

அதனைத் தொடர்ந்து மன்றத்தின் செயலாளராக கடமையாற்றிய திரு.மார்க்கண்டு செந்தில்நாதன் அவர்கள் தனது செயலாளர் பதவியை இராஜினாமா செய்வதாகவும், தொடர்ந்தும் நிர்வாக சபையில் அங்கம் வகிக்க விரும்புவதாகவும் தெரிவித்து தனது செயலாளர் இராஜினாமா கடிதத்தை தலைவரிடம் கையளித்தார். அத்துடன் உப தலைவராக பதவி வகித்த திரு.சங்கரப்பிள்ளை தவராஜா அவர்களும் தனது உப தலைவர் பதவியை இராஜினாமா செய்து தொடர்ந்தும் நிர்வாக சபையில் அங்கம் வகிக்க விரும்புவதாக தெரிவித்து தனது உபதலைவர் பதவி இராஜினாமா கடிதத்தை தலைவரிடம் கையளித்தார். இவை தொடர்பாக நிர்வாக சபையில் கலந்தாலோசிக்கப்பட்டு  செயலாளர் இராஜினாமா, உபதலவர் இராஜினாமா தலைவரினால் ஏற்றுக்கொள்ளப்பட்டது. தொடர்ந்து புதிய செயலாளர் ஒருவரை தெரிவு செய்வது தொடர்பாக கலந்தாலோசிக்கப்பட்டு நிர்வாக சபையில் பிரசன்னமாகியிருந்த 12 அங்கத்தவர்களும் ஏகமனதாக திரு.தீசன் திரவியநாதன் அவர்களை பதில் செயலாளராக தெரிவு செய்தனர். தொடர்ந்து உபதலைவர் தெரிவு செய்யப்பட்டார். கலந்து கொண்ட நிர்வாக சபையினர் ஏகமனதாக திரு.பொன்னம்பலம் தவக்குமார் அவர்களை உபதலைவராக தெரிவு செய்தனர்.

திரு.மார்க்கண்டு செந்தில்நாதன், திரு.சங்கரப்பிள்ளை தவராஜா ஆகியோர் தாம் வகித்த பதவிகளில் போதியளவு நேரத்தை செலவிட முடியாத நிலையில் வேலைப்பழு காரணமாகவே தமது பதவிகளை இராஜினாமா செய்வதாக அறியப்படுத்தியிருந்தனர்.

இன்றைய அவசர விசேட நிர்வாக சபை கூட்டம் 3 மணிநேரத்திற்கும் மேற்பட்ட சுமூகமான கலந்துரையாடல் மற்றும் நட்பு ரீதியாக பல விடயங்கள் கலந்தாலோசிக்கப்பட்டு மன்றத்தின் யாப்பு விதிகளிற்கு அமைவாக நடைபெற்று மாலை 6.30 மணியளவில் இனிதே நிறைவு பெற்றது.