திருவிழாப் படங்கள் – Page 11

தில்லைகூத்தனின் ஆலயத்தில் தீர்தோற்சவத்தையொட்டி பிரதேசத்தின் பல பாகங்களில் இருந்தும் பல அடியார்கள் பால்காவடி பறவைகாவடி போன்றவற்றை பல மைல் தூரம் சுமந்து தமது நேர்த்தி கடன்களை நிறைவேற்றுவதை படங்களில் காணலாம்.

களபூமி திக்கரை முருகன் ஆலயத்தில் இருந்து புறப்பட்டு சிவன் கோவிலை வந்தடைந்த காவடி காட்சிகள்

பயிரிக்கூடல் சுப்பிரமணியசுவாமி ஆலயத்தில் இருந்து புறப்பட்டு சிவன் கோவிலை வந்தடைந்த காவடி காட்சிகள்

மருதடி பிள்ளையார் ஆலயத்தில் இருந்து புறப்பட்டு சிவன் கோவிலை வந்தடைந்த காவடி காட்சிகள்

வேறு இடத்தில் இருந்து வந்த காவடிகள்

கனடா றிச்மன்ட் ஹில் பிள்ளையார் கோவிலில் நடைபெற்ற ஆனந்த நடராஜனின் ஆருத்திரா தரிசனம்

கனடா-காரை கலாச்சார மன்றத்தின் உபயத்தில் கனடா றிச்மன்ட் பிள்ளையார் கோவிலில் ஆண்டுதோறும் நடத்தப்படும் திருவாதிரைத் திருவிழா இன்று வெள்ளிக்கிழமை (25.12.2015) அதிகாலை 5:30 இற்குத் தொடங்கி நடைபெற்றது.

நடராஜப்பெருமானுக்கு நடைபெற்ற ஆதிரை அபிசேகம் கண்கொள்ளாக் காட்சியாக இருந்தது.

அபிசேகம் முடிவடைந்ததும் நடராஜப் பெருமானுக்கு அலங்கார சாத்துப்படி நடைபெற்றுக்கொண்டிருந்தவேளையிலே சிவனடியார்களுக்குச் செவியின்பம் தரும் அருமையான இன்னிசை; கச்சேரியை காரைநகர் தந்த இளம்கலைஞர்கள் வழங்கி அசத்தியிருந்தனர்.

செல்வன் வைகுந்தன் தர்மராஜா தேமதுரக் குரலால் வாய்ப்பாட்டு இசைக்க செல்வன் செந்தூரன் தர்மராஜா மிருதங்கம் இசை வழங்க திருமதி.சத்தியசொரூபி தீபன் அவர்கள் வயலின் இசை வழங்கினார்.

இந்த அரங்கேற்றம் கண்ட இளம்கலைஞர்கள் மூவரும் காரைநகர் நீலிப்பந்தனையைச் சேர்ந்த கந்தையா சிவமணி தம்பதிகளின் பேரப்பிள்ளைகள் என்பது குறிப்பிடத்தக்கது.

தொடர்ந்து இன்னிசை வேந்தர் சங்கீதபூசணம் திரு.பொன்.சுந்தரலிங்கம் அவர்கள் மணிவாசகப் பெருமான் அருளிய திருவெம்பாவைப் பாடல்களை இசைக்க தில்லைப்பெருமானுக்கு ஆலய அந்தணப்பெருமக்கள் பூசை வழிபாடுகளை ஆகம முறைப்படி நடத்தினர்.

தொடர்ந்து தவில் நாதஸ்வர வாத்தியங்கள் முழங்க பக்தர்கள் வர்ண மலர்களைத் தூவ தில்லை நடராஜப் பெருமான் ஆனந்தத் தாண்டவமாடியவண்ணம் வீதியுலா வந்த அருள் காட்சியைக் கண்டு சிவனடியார்கள் ஆனந்தக் கண்ணீர் சொரிந்தவாறு பேரானந்தம் அடைந்தனர்.

அவனருளாலே அவன்தாள் வணங்கி ஆருத்திரா தரிசனம் கண்டு ஆனந்தமடைந்த அடியார்கள் விபூதி பிரசாதங்களைப் பெற்று மகேசுவர பூசையிலும் கலந்துகொண்டு வீடு சென்றனர்.

கனடா திருவாதிரைத் திருவிழாவின் காட்சிகளை இங்கே காணலாம்.